Semeıde órtten 2 adam ajal qushty
SEMEI. QazAqparat - Semeıde turǵyn úıdegi órttiń saldarynan eki adam ajal qushty, dep habarlaıdy QazAqparat qalalyq Tótenshe jaǵdaılar basqarmasynyń baspasóz qyzmetine silteme jasap.
Oqıǵa «Ýranhaev, 20» mekenjaıyndaǵy 5 qabatty turǵynúıdegi páterde tirkeldi. Vedomstvonyń deregine qaraǵanda, órt aýyz úıden shyqqan. Saldarynan páterdegi jıhaz, jeke zattar men aǵash qurylymdar janyp ketti. Tilsiz jaý 20 sharshy metr aýmaqty sharpyǵan.
Qutqarýshylar tilsiz jaýdy sóndirý kezinde úı ishinen 67 jastaǵy er adam men 59 jastaǵy áıel adamnyń múrdesin alyp shyqty. Qazir mamandar órttiń naqty shyǵý sebepteri men shyǵyn kólemin anyqtap jatyr. Aldyn ala boljam boıynsha qaıǵyly jaǵdaıdyń oryn alýyna elektr toǵynyń tuıyqtalýy sebep bolǵan.
«Órt týraly habardy kýágerler berdi. Úı ıeleri uıyqtap jatyp, órt shyqqanyn sezbegen. Saldarynan kók tútinge ýlanyp qalǵan. Qazir órttiń naqty sebebi tekserilip jatyr» delingen habarlamada.
