Semeıde órtke oranǵan úıden eki qarııany qutqarǵan azamattar marapattaldy

ASTANA. KAZINFORM — Abaı oblysynyń Tótenshe jaǵdaılar departamentinde Semeı qalasyndaǵy órt kezinde eki adamdy qutqaryp qalǵan batyl azamattardy qurmetteý rásimi ótti, dep habarlaıdy TJM baspasóz qyzmeti.

— Tótenshe jaǵdaılar mınıstri general-leıtenant Shyńǵys Árinovtyń buıryǵyna sáıkes, Isaı Qydyrhanov pen Tımýr Kákimov «Órtte kórsetken qaısarlyǵy úshin» medalimen marapattaldy. TJD bastyǵy Manarbek Shapaǵatov saltanatty túrde azamattarǵa nagradalardy tabystap, kórsetken batyldyǵy men tabandylyǵy úshin alǵysyn bildirdi, — delingen vedomstvo habarlamasynda.

Esterińizge sala keteıik, 2025 jyldyń 23 qazanynda Semeı qalasynda jeke turǵyn úıde órt shyqqan. Órtke qarsy qyzmet bólimsheleri kelgenge deıin Isaı Qydyrhanov pen Tımýr Kákimov batyldyq pen tabandylyq tanytyp, janyp jatqan úıge kirip, eki qart adamdy qaýipsiz jerge alyp shyqqan. Sonymen qatar, jarylystyń aldyn alý maqsatynda olar gaz ballonyn da syrtqa shyǵarǵan bolatyn.

Bul is-áreket nemquraılylyq tanytpaı, syn saǵatta adamdardy qutqarý úshin baryn salǵan qarapaıym turǵyndardyń azamattyq jaýapkershiligi men batyrlyǵynyń jarqyn úlgisi bola bildi.

Osyǵan deıin Aqmolada quqyqbuzýshylyqty anyqtaýǵa kómektesken oqýshy marapattalǵanyn jazǵanbyz.