Semeıde órtengen úıdiń 9-qabatynan boıjetken sekirip ketti
SEMEI QazAqparat – Semeı qalasynda órtengen toǵyzynshy qabattaǵy balkonnan 18 jastaǵy qyz sekirip ketti, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, oqıǵa 15 tamyzda saǵat 12.00 shamasynda Shákárim kóshesinde boldy.
«9-qabattaǵy páterdiń balkonynda órt shyqqan. Órt sóndirýshiler kelip jetken kezde úı ishi kók tútinge oranyp jatty. Qutqarýshylar 18 jastaǵy qyzdy evakýatsııalaý úshin birden baspaldaq qoıdy. Alaıda óne-boıyn úreı bılegen qyz balkonnan sekirip ketti. Qazirgi ýaqytta jedel járdem qyzmetkerleri jábirlenýshini aýrýhanaǵa jetkizgen», - delingen habarlamada.
Qutqarýshylar jalpy aýdany 6 sharshy metrge jetken tilsiz jaýdy aýyzdyqtady. Aldyn ala málimet boıynsha órttiń shyǵýyna – otty abaısyz qoldaný sebep bolǵan.
