Semeıde órtengen úıde qalyp qoıǵan er adam qutqaryldy
SEMEI. QazAqparat – Semeı qalasynda qutqarýshylar otqa oranǵan úıden er adamdy alyp shyqty, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 7 aqpan keshki saǵat 21.00 kezinde Vostochnyı kentindegi jer úıde órt shyqqany jaıly habar túsken.
Oqıǵa ornyna órt sóndirýshiler kelgende tilsiz jaý qonaq bólmedegi kilem men lınoleýmdy sharpyp jatty.
«Úı ishinde qalyp qoıǵan 1974 jylǵy azamat evakýatsııalandy. Qutqarýshylar ony birden jedel járdem qyzmetkerlerine tapsyrdy» dep habarlady vedomstvo ókilderi.
Birneshe mınýttan keıin 1 sharshy metrge jaıylǵan qyzyl jalyn aýyzdyqtaldy.
Aldyn ala málimet boıynsha, úıge bireý qasaqana órt qoıýy múmkin.
