Semeıde órtengen páterden alty jasar bala qutqaryldy
SEMEI. QazAqparat – Semeıde kópqabatty úıdegi órt kezinde 6 jasar bala qutqaryldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetinshe, 9 qazan kúni saǵat 15:40 kezinde órt sóndirý qyzmetine Pervomaı kóshesindegi kópqabatty turǵyn úıdiń 10-qabatyndaǵy páterde órt shyqqany týraly habar túsken. Belgili bolǵandaı, páter ishinde 6 jasar bala qalyp qoıǵan.
«Avtobaspaldaqtyń kómegimen órt sóndirýshi Aıdos Qabdyǵalı 10-qabatqa kóterilip, tereze sańylaýy arqyly páterge kirdi. Zalda jıhaz, turmystyq zattar órtenip jatqan. Tilsiz jaýdyń jalpy aýdany 10 sharshy metrdi qurady. Bul kezde bala jatyn bólmedegi terezeniń janynda bolǵan. Búldirshin birden evakýatsııalanyp, jedel járdem qyzmetkerlerine tapsyryldy», - dep habarlady vedomstvo ókilderi.
Osy ýaqytta podezden 20 eresek adam men 7 bala shyǵarylǵan. Jarty saǵat ishinde órt sóndirýshiler qyzyl jalyndy aýyzdyqtady.
Jalyndy óshirýge jeke quramnan 25 adam men 5 avtotsısterna jumyldyrylǵan.
