Semeıde órt sóndirý kóliginiń jolyn bógegen 5 júrgizýshige aıyppul salyndy

SEMEI. QazAqparat – Semeı qalasynda órt sóndirý kóliginiń jolyn bógegen 5 júrgizýshige aıyppul salyndy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, órt sóndirý kóliginiń qozǵalysyna kedergi keltiretinderdi jaýapqa tartý maqsatynda arnaıy reıd júrgizildi.

«Órt sóndirýshiler ǵımarattar men turǵyn úılerdegi qyzyl jalyndy aýyzdyqtaýǵa attanǵanda kólikterdiń barar joldy bógep turýy kóp kedergi keltiredi. Osyǵan baılanysty polıtseıler men qutqarýshylar Semeı qalasyndaǵy kópqabatty turǵyn úılerdiń aýlalaryna reıdke shyqty. Shara barysynda 5 júrgizýshi QR ÁQBtK-niń 597-baby 3-bóligi (Kólik quraldaryn toqtatý nemese toqtap turý qaǵıdalaryn buzý) boıynsha jaýapqa tartyldy», - delingen aqparatta.

Osy rette, departament mamandary júrgizýshilerge kólikti aýlalarǵa qoıǵanda joldy bógemeı, órt sóndirý tehnıkalardyń qozǵalysyna kedergi keltirmeýdi suraıdy.