Semeıde órt kezinde áıel adam tirideı janyp ketti
SEMEI. QazAqparat - Qaıǵyly jaǵdaı Semeıdegi jeke úılerdiń birinde bolǵan. «Vostochnyı» kentindegi «Vostochnyı» kóshesinde ornalasqan jeke úıden órt shyǵyp, ondaǵy 61 jastaǵy áıel janyp ketken, dep habarlaıdy «QazAqparat» HAA tilshisi.
Órt keshki saǵat 22:00-de shyqqan. Kórshiler óz kúshterimen áıeldi qutqarý úshin terezeni syndyrǵan, keıin órt sóndirý qyzmetin shaqyrǵan. Alaıda, belgili bolǵandaı, aýa aǵyny órtti órshitip jibergen. Órt sóndirýshiler habar túskennen keıin oqıǵa ornyna 5 mınýttyń ishinde barǵan, alaıda áıelge kómektesý múmkin bolmaǵan. Ol órt kezinde tirideı janyp ketken.
Órt 57 sharshy metr jerdi sharpyǵan. Sondaı-aq, órt sóndirýshiler úıden jarylyp úlgermegen gaz ballonyn alyp shyqqan. Órt saǵat 22:57-de sóndirilgen.
Qaza tapqan áıel demalysta, úıinde jalǵyz júrgen, al jubaıy bolmaǵan.
Órttiń shyǵý sebebi anyqtalyp jatyr. Aldyn ala nusqa boıynsha, órt dálizden bastalǵan, sondyqtan marqum úıden shyǵa almaı qalǵan.
