Semeıde órt bolǵan aýladan 100 gaz ballony shyǵaryldy
ÓSKEMEN. Semeı qalasynyń Berezovskıı kentindegi qospáterli jer úıde 5 lıtrlik gaz balonyń aqaýynan oqys oqıǵa boldy, dep habarlaıdy QazAqparat tilshisi.
Jarylys saldarynan úı ıesiniń denesin 90 paıyz kúıik shalyp, aýyzǵy bólmeniń 12 sharshy metri qıraǵan.
«58 jastaǵy turǵyn gaz ballonyn satýdy kásip etken. Aqaýy bar ballonnyń kesirinen ol qalalyq aýrýhananyń jansaqtaý bólimine tústi. Onyń aıaq-qolynyń 90 paıyzyn kúıik shalǵan. ІІІ dárejeli kúıik. Odan ózge zardap shekkender joq» - delingen qalalyq tótenshe jaǵdaılar basqarmasy taratqan aqparatta.
Dúmpýden kórshi úıge de zaqym kelgen. Qos páterdiń arasyn bólip turǵan qabyrǵada jaryqshaqtar paıda bolyp, úsh terezeniń jaqtaýy búlindi. Oqys oqıǵa kezinde aýlada 100 gaz ballon tıelgen arnaıy júk kóligi turǵan. Tótenshe jaǵdaı qyzmetkerleri dúmpýdiń olarǵa áser etpeýin ǵajaıyp jaǵdaıǵa teńep otyr.
Oqıǵanyń naqty sebebi ázirge belgisiz.
