Semeıde orman órtinen keltirilgen shyǵyn kólemi belgili boldy

SEMEI. QazAqparat - «Semeı ormany» tabıǵı rezervatyndaǵy órtti kezinde tabıǵatqa 78 mln teńge kóleminde zalal keltirilgen. Tekserý jumystaryn júrgizgen arnaıy komıssııa osyndaı sheshim shyǵardy, dep habarlaıdy QazAqparat.

Eske sala ketsek, 21 mamyr kúni saǵat 14.00-de «Semeı ormany» tabıǵı rezervaty aýmaǵyndaǵy orman órtengen bolatyn.

Órtten orman aýmaǵynyń 260 gektary janyp ketti. Onyń ishinde 218 gektary qylqan japyraqty aǵashtar. Tilsiz jaýdy sóndirýge 350 adam jáne 40 arnaıy tehnıka jumyldyryldy. Qazir mamandar órtengen aýmaqtardy qalypqa keltirý jumystarymen aınalysyp jatyr. Al órttiń shyǵýyna adam kináli ekeni anyqtaldy. 

Tergeý jumystary áli jalǵasýda.

«Arnaıy jasaqtalǵan komıssııa óz jumysyn aıaqtap, tolyq shyǵyn kólemin anyqtady. Qazir mamandar órt oryn alǵan aýmaqta janyp ketken aǵashtardy kesip, aýmaqty tazalaýmen aınalysyp jatyr. Bul jerlerge qaıtadan aǵash otyrǵyzylady. Al órttiń ádeıi qoıylǵany belgili boldy. Bul jumystarmen qalalyq Іshki ister basqarmasynyń mamandary aınalysýda», - dedi «Semeı Ormany» memlekettik orman tabıǵı rezervatynyń bólimshe dırektory Rınat Bastamıev.