Semeıde Óńirlik kommýnıkatsııalar qyzmetiniń fılıaly ashyldy
SEMEI. QazAqparat - «Shyǵys aqparat» medıaholdıngi Semeı qalasynan Óńirlik kommýnıkatsııalar qyzmetiniń fılıalyn ashty. Bul týraly QazAqparat Semeı aqparattyq ortalyǵyna silteme jasap habarlaıdy.
Aqparattyq ortalyqtyń tusaýkeserine medıaholdıng tóraǵasy Nurbek Bekenov jáne qala ákimi Ermak Sálimov qatysty.
Baspasóz máslıhaty barysynda N. Bekenov elimizdiń rýhanı-mádenı ortalyǵynda kommýnıkatsııalar qyzmetiniń ashylýy óńirdiń barlyq mańyzdy oqıǵalaryn jarııalaýǵa úlken serpin beretinin jetkizdi.
«Búgingi tańda Semeı qalasynda 30-ǵa jýyq baspa jáne elektrondyq buqaralyq aqparat quraly tirkelgen. Qalada eki telearna, birneshe gazet, radıo jumys isteıdi. Osy jerde apta saıyn jergilikti atqarýshy bılik pen jaqyn mańdaǵy aýdandar, aýyldyq okrýgter ákimderiniń qatysýymen baspasóz konferentsııalary ótedi. Ortalyqtyń qyzmeti qala men oblystyń aqparattyq-memlekettik saıasatyn jetildirýge baǵyttalatyn bolady. Onyń ishinde, BAQ-ta tekserilmegen málimetterdiń aldyn alý jáne olardyń taralýynyń jolyn kesý jumystary bar», - dedi N.Bekenov.
Nurbek Bekenov óńirde 7 jyl boıy ShQO Aqparattyq ortalyǵy jumys isteıtinin aıtty. Internet-resýrstarda shekteýsiz kólemde resmı jáne shynaıy aqparatty ornalastyrý, onyń ártúrli saıttarda shyǵýyn qadaǵalaý - ortalyq jumysynyń basty maqsaty.
Jıynda Ermak Sálimov jýrnalısterge qalanyń áleýmettik-ekonomıkalyq damýy týraly aıtyp, BAQ ókilderiniń suraqtaryna jaýap berdi.
«Men barlyqtaryńyzdy aqparattyq ortalyqtyń ashylýymen quttyqtaımyn.Turǵyndarǵa aqparat jedel túrde jetýi úshin aqparattyq ortalyq bazasynda baspasóz máslıhattary ótetin bolady», - dedi Semeı qalasynyń ákimi.
Shara sońynda «Shyǵys aqparat» medıaholdıngi men «Qazaqstan» RTRK» AQ Semeı qalasyndaǵy fılıaly arasynda ózara yntymaqtastyq týraly memorandýmǵa qol qoıyldy.
