Semeıde «Óńirlerdegi etnoáleýmettik jáne etnokonfessııalyq úderisterdi tıimdi basqarý» aımaqtyq semınar-trenıng ótýde
ASTANA. 15 mamyr. QazAqparat - Semeı memlekettik pedagogıkalyq ınstıtýty ǵımaratynda «Óńirlerdegi etnoáleýmettik jáne etnokonfessııalyq úderisterdi tıimdi basqarý» taqyrybynda úsh kúndik aımaqtyq semınar-trenıng óz jumysyn bastady.
Bul týraly Semeı qalasynyń ishki saıasat bóliminen habarlandy.
Іs-sharany Qazaqstan halqy Assambleıasy, QR Prezıdentiniń janyndaǵy Memlekettik basqarý akademııasy jáne Shyǵys Qazaqstan oblysynyń ákimdigi uıymdastyryp otyr. Semınar Qazaqstan Respýblıkasy Prezıdentiniń janyndaǵy Memlekettik basqarý akademııasy Etnosaralyq jáne konfessııaaralyq qatynastardy zertteý ortalyǵynyń bilim berý jáne ǵylymı uıymdastyrý is-sharalar jospar-kestesine sáıkes ótýde.
Semınar-trenıng jumysy barysynda Qazaqstan halqy Assambleıasy Hatshylyǵy meńgerýshisiniń orynbasary Leonıd Prokopenko, Semeı qalasy ákiminiń orynbasary Záýresh Isabaeva, Qazaqstan Respýblıkasy Prezıdentiniń janyndaǵy Memlekettik basqarý akademııasy etnosaralyq jáne konfessııaaralyq qatynastardy zertteý ortalyǵynyń jetekshisi Aıgúl Sádýaqasova jáne Semeı memlekettik pedagogıkalyq ınstıtýtynyń rektory Maqtaǵalı Bektemesov sóz sóıledi.
Atalmysh keńeske Pavlodar jáne Shyǵys Qazaqstan oblystarynyń etnosaralyq qatynastar máselesimen aınalysýshy memlekettik qyzmetkerler, qala jáne aýdan ákimderiniń orynbasarlary, qalalyq jáne aýdandyq ishki saıasat bólimderiniń basshylary, etnomádenı, jastar jáne basqa da qoǵamdyq birlestik jetekshileri, konfessııalardyń, QHA ǵylymı-sarapshylyq toptarynyń, JOO ókilderi qatysýda.
Semınardyń maqsaty - Qazaqstan Respýblıkasynyń Prezıdenti - Elbasy Nursultan Nazarbaevtyń «Qazaqstan - 2050» strategııasy - qalyptasqan memlekettiń jańa saıası baǵyty» atty Qazaqstan halqyna Joldaýy jáne Qazaqstan halqy Assambleıasynyń XX sessııasynda bergen jańa mindetteri aıasynda etnoáleýmettik jáne etnokonfessııalyq úderisterdi tıimdi basqarý boıynsha tyńdaýshylardyń kásibı bilimi men biliktilik deńgeıin arttyrý.
Іs-shara barysynda etnomádenı ortalyqtar ózara tájirıbe almasyp, qoǵamdyq kelisim jáne ulttyq birlikti nyǵaıtýǵa baǵyttalǵan mindetter men qajetti sharalar qarastyrylady.
