Semeıde ónerkásip óndirisin keńeıtýge 500 gektar jer bólinedi

ASTANA. KAZINFORM — Abaı oblysynda ınvestıtsııa tartý jáne óńirdiń jańa ónerkásiptik bazasyn qalyptastyrý jospary qandaı? Bul saýalǵa oblys ákimi Berik Ýálı jaýap berdi. 

— Aýmaǵy 96 gektardy quraıtyn «Óndiris» ındýstrııalyq aımaǵynda 3 jańa jobaǵa jer berilip, tolyqqandy ıgerildi. Indýstrııalyq aımaqty 186 gektarǵa deıin keńeıtip, shaǵyn ónerkásip parkin qurý jumystary júrgizilip jatyr, — dedi Berik Ýálı ortalyq kommýnıkatsııalar qyzmeti alańynda óńirdiń 9 aı ishindegi áleýmettik-ekonomıkalyq damýy týraly esep bere turyp.

Óńir basshysynyń málimdeýinshe, ınvestorlardyń óńirge degen qyzyǵýshylyǵy ındýstrııalyq aýmaqty keńeıtý qajettiligin kórsetip otyr. 

— Osyǵan baılanysty Semeı qalasynyń ónerkásiptik aýmaǵynda 500 gektar jer bólýdi josparladyq. Bul jobany iske asyrý ınvestıtsııa tartýǵa, jańa óndiris pen jumys oryndaryn qurýǵa múmkindik berip, óńirdiń turaqty damýyn qamtamasyz etedi, — dep tolyqtyrdy ákim.

Aıta ketsek, jyl sońynda deıin Abaı oblysynda 255 jumys ornymen qamtıtyn 7 joba júzege asyrylady. 

Sondaı-aq oblys ákimi Alakóldiń týrıstik jáne ınvestıtsııalyq áleýetine qatysty túsinik berdi.

Buǵan deıin habarlaǵanymyzdaı bıyl Abaı oblysynda ınvestıtsııa tartý 103,1 paıyzǵa ósken.