Semeıde oqýshylar ótkizgen Vena balynda 800 myń teńgege jýyq qarajat jınaldy
Igilikti shara bıyl besinshi jyl uıymdastyrylyp otyr. Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń uıymdastyrýymen ótken kesh Elbasynyń «Rýhanı jańǵyrý» baǵdarlamasyn júzege asyrý barysynda «Nazarbaev Zııatkerlik mektepteri» DBBU 10 jyldyq mereıtoıyna arnaldy.Jalpy Vena balyna 600 -den astam oqýshy, 120 mektep muǵalimi, 100 -ge jýyq ata-ana qatysty.
Kesh barysynda mektep oqýshylarynyń qolynan shyqqan túrli óner týyndylary aýktsıon arqyly saýdalandy. Mektep muǵalimi Nartaı Sovethanuly júrgizgen aýktsıon kelgen qonaqtardyń qyzyǵýshylyǵyn týdyryp, bás saýdaǵa tigilgen zattardyń bastapqy baǵasynan birneshe esege qymbat ótti.
«Mektebimizde Vena balyn ótkizý dástúrge aınalyp keledi. Mundaǵy maqsat - oqýshylarymyzdyń qoǵam aldyndaǵy azamattyq ári áleýmettik jaýapkershiligin qalyptastyryp, adamı qasıetterin ushtaı túsý. Bul qaıyrymdylyq sharasy bolǵandyqtan, shákirtterimiz óz aınalasyndaǵy múmkindigi shekteýli adamdarǵa durys qarap, olarǵa kómek qolyn sozýǵa múmkindik alady. Jalpy qaıyrymdylyq sharasy mektebimizde jıi ótip turady. Biz bul baǵytta Semeı qalalyq arnaıy áleýmettik qyzmet kórsetý ortalyǵymen tyǵyz qarym-qatynasta jumys jasaımyz. Búgingi sharada qaıyrymdylyqtan túsken qarjydan osy mekemeden kómek alatyn 5 múmkindigi shekteýli balaǵa aqshalaı kómek beremiz», -dedi mektep dırektory Baǵdan Qaıyrjanov.
Vena balynda jalpy somasy 780 myń teńge jınaldy. Keshke arnaıy shaqyrylǵan múmkindigi shekteýli 5 balanyń árqaısysyna 100 myń teńgeden berildi. Qalǵan 280 myń teńge mektepte bilim alatyn kópbalaly otbasydan shyqqan, turmys jaǵdaıy nashar 10 balanyń qajetine jaratylady. Aldaǵy ýaqytta tıisti komıssııa músheleri atalǵan 10 balaǵa naqty qandaı kómek kerek ekenin anyqtap, sol boıynsha qajetti kıim-keshekterin satyp alyp bermek. Sondaı-aq mektep ákimshiligi qaıyrymdylyqqa belsene qatysyp, demeýshilik jasaǵan ata-analarǵa Alǵys hat tabys etti.