Semeıde oqýshy tasymaldaıtyn avtobýstardyń ne sebepti azaıtylǵandyǵy túsindirildi
SEMEI. QazAqparat – Semeı qalasynda oqýshy tasymaldaıtyn avtobýstardyń ne sebepti azaıtylǵandyǵy túsindirildi, dep habarlaıdy QazAqparat tilshisi.
Sońǵy kúnderi áleýmettik jelilerde oqýshy tasymaldaıtyn qoǵamdyq kólikter sanynyń azaıtylǵandyǵy qyzý talqyǵa túsip jatyr.
«Tańerteń avtobýstar lyq toly. Sabaqqa keshigip qalmas úshin aıaldamaǵa bir jarym saǵat erte barý kerek. Sonyń ózinde avtobýsqa syımaı qalatyn kezder az emes», - dep jazýda jeli qoldanýshylary.
Osyǵan oraı qalalyq bilim bóliminiń basshysy Natalııa Fesenko túsinik berdi. Onyń aıtýynsha, qoǵamdyq kólik sany osyǵan deıin epıdemıologııalyq jaǵdaıdyń ýshyǵýyna baılanysty ulǵaıtylǵan.
«Búgingi tańda jaǵdaı turaqty. Mektepter offlaın rejimde jumys isteýde. Osylaısha, qalalyq marshrýt jelisinen oqýshy tasylmaldaý úshin alynǵan 25 avtobýs óz marshrýttaryna oralady», - dedi N. Fesenko.
