Semeıde oqýshyny zorlaǵan muǵalim ómir boıyna bas bostandyǵynan aıyryldy

SEMEI. KAZINFORM – Semeı qalasynda oqýshy qyzdy zorlaǵan muǵalimge qatysty sot úkimi shyqty.

Іs jabyq rejımde oblystyq Qylmystyq ister jónindegi mamandandyrylǵan aýdanaralyq sotynda qaraldy.

32 jastaǵy er adam kámelettik jasqa tolmaǵan qyzdy zorlady dep aıyptaldy. Belgili bolǵandaı, ol Semeıdegi mektepterdiń birinde alǵashqy áskerı daıyndyq pániniń muǵalimi bolyp jumys istegen.

Sottyń baspasóz qyzmeti usynǵan málimetke súıensek, aıyptalýshy oqýshyny kólikte zorlaǵan. 

– Іs Qylmystyq Kodekstiń 120-baby 4-bóligi (14 jasqa tolmaǵan balany ​​zorlaý) boıynsha qaraldy. Aıyptalýshynyń kinási jan-jaqty zerttelgen is materıaldarymen rastaldy. Sot sheshimimen kináli dep tanylǵan sottalýshy ómir boıyna bas bostandyǵynan aıyryldy. Sondaı-aq oǵan pedagogıkalyq jáne kámeletke tolmaǵandarmen jumys isteýge baılanysty kez kelgen laýazymdy atqarýǵa ómir boıyna tyıym salyndy, - delingen aqparatta. 

Eks-muǵalim jazasyn qatań rejımdegi túzetý mekemesinde óteıdi.

Eske salsaq, Aqtaýda da qyz zorlaý týraly istiń bas fıgýranty ómir boıyna bas bostandyǵynan aıyrylǵan bolatyn.