Semeıde oqyp júrgen pákistandyq stýdent Abaıdyń barlyq óleńin jatqa biledi

Semeıdegi Shákárim ýnıversıtetinde Abaıdyń barlyq óleńderin jatqa biletin pákistandyq stýdent bilim alyp jatyr, dep habarlaıdy Kazinform.

Naqtylap aıtqanda, Mýhammad Ýsama Shahıd – Pákistan eliniń Pendjab oblysy Chınıot qalasynan kelgen. Jas izdenimpaz 7 tildi biletin polıglot.

Ýsamanyń aıtýynsha, ol balalyq shaǵyn Orta Azııada ótkizgendikten TMD elderindegi atmosfera men ómir salty oaǵan qatty unaǵan. Arnaıy qazaq tili men qazaq halqynyń mádenıetin, ulttyq qundylyqtaryn úırengisi keldi.

"Qazaq halqynyń bolmysy men tanymyn qazaqtyń uly aqyny Abaı Qunanbaıulynyń óleńderi arqyly túsine bastady. Ǵalamtordan aqynnyń ómirbaıanyn zertteý arqyly qasıetti Abaı óńirine kelip, atalǵan bilim ordasyn tańdaǵan.

Barshańyzǵa belgili, uly Abaı atamyzdyń óleńderin jattaý ońaıǵa soǵa bermeıdi. Solaı bola tursa da, alǵan betinen qaıtpaı uly danyshpannyń muralaryna den qoıǵandyǵy barshamyzdy tańqaldyrǵany jasyryn emes. Ýsama – ýnıversıtettiń belsendi stýdentteriniń biri. Jaz boıy Qabyldaý komıssııasynda qyzmet atqaryp, túrli sporttyq sharalardyń jeńimpazy atandy. Til úırenýde ol ártúrli kitaptardy, maqalalardy oqyp, jańalyqtardy tyńdap, qazaq tilindegi telehıkaıalar men fılmderdi únemi kóredi", - dep jazdy Ǵylym jáne joǵary bilim mınıstri Saıasat Nurbek.

Sonymen qatar sheteldik stýdent Instagram áleýmettik jelisinde kúndelikti qazaq tilin úıretetin toptarǵa jazylǵan.

"Abaıdy sanasyna serik etken, oqýǵa qushtar, bilimge degen talpynysy kúshti Ýsamadaı jas órenge qashanda sáttilik serik bolsyn deımin.

Shákárim aqyn aıtqandaı:
Bul Abaı saýdager ǵoı aqyl satqan,
Ártúrli asyly kóp ótpeı jatqan.
Tegin bilseń – alasyń, bos beredi,
Tustasynan eshkim joq muny tapqan, - degen sózin sımvol etetin jastardyń qatary kóbeıe bersin", - degen mınıstr.

Ýsama keleshekte aýdarmashy bolyp qyzmet atqarǵysy keledi. Qazaq tilindegi óleńder men áńgimelerdi ýrdý jáne pendjab tilderine aýdarýǵa nıetti.