Semeıde Nazarbaev zııatkerlik mektebiniń ujymy jetim qyzǵa páter alyp berdi
SEMEI. QazAqparat - 19 jastaǵy Erkejan Ersinqyzy ata-anasynan erte aıyrylǵan. Oblystyq bilim basqarmasymen aradaǵy ata-ana qamqorlyǵynsyz qalǵan balalar men jetim balalarǵa áleýmettik-patronattyq qoldaý boıynsha ózara yntymaqtastyq aıasynda Nazarbaev Zııatkerlik mektebiniń ujymy 2013 jyldan beri Erkejannyń turǵyn úı jınaq qoryna qarjy aýdaryp kelgen. Búgin mektep ujymy boıjetkenge 1 bólmeli pəterdiń kiltin saltanatty túrde tabystady, dep habarlaıdy QazAqparat.
Aıagóz qalasynyń týmasy Erkejan Ersinqyzy búgin óz páterine qol jetkizdi. Bala kúninen taǵdyrdyń qatal synyna ushyraǵan qyzǵa baspana áperýge Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń ujymy sebepker boldy.
«Urpaq tárbıeshisi retinde bizdi dál osy Erkejandaı jastarymyzdyń keleshegi alańdatady. Qyzymyzdyń baqytty sátine ortaqtasyp, armanyna qol jetkizýine sebepshi bolǵanymyzǵa biz de qýanyshtymyz. Biz páterdi tańdaý quqyn Erkejannyń ózine berdik. Tek tıisti qujattarynyń durys rásimdelýine qyzmetkerlerimiz kómektesti. Bul baspana oǵan qut-bereke ákeletin shańyraq bolsyn dep tileımiz» - dedi Semeı qalasyndaǵy fızıka-matematıka baǵytyndaǵy Nazarbaev Zııatkerlik mektebiniń dırektory Baǵdan Qaıyrjanov.
19 jastaǵy boıjetken ákesinen sábı kúninde, anasynan 12 jasynda aıyrylypty. Sońǵy 5 jyldan beri nemereles aǵasy Rollan Sýyqbaevtyń shańyraǵynda turyp jatyr.
«Óz baspanam bolǵanyn armandasam da, aıaqasty úıli bolamyn dep esh oılamappyn. Tipti mektepten habarlasyp, seniń bankte esep-shotyń bar, sol shottaǵy aqshaǵa úı alyp beremiz degende múldem senbedim. Búgin qýanyshtan tolqyp turmyn. Ómirde qaıyrymdy, janashyr adamdardyń bar ekenine kózim jetti», - deıdi Erkejan Ersinqyzy.
Qazir Erkejan Aıagóz qalasyndaǵy polıtehnıkalyq kolledjdiń 3-kýrsynda «Baǵdarlamashy» mamandyǵynda oqyp júr.
«Oqýymdy ýnıversıtette jalǵastyram degen jospar bar. Keler jyly qalaǵa kelemin», - degen Erkejanǵa mektep ujymy baspanasynyń alǵashqy jıhazy retinde mıkrotolqyndy peshti syıǵa tartty.
