Semeıde Naýryz meıramy qalaı atap ótýde

SEMEI. QazAqparat – Semeı halqy Naýryz meıramyn toılap jatyr, dep habarlaıdy QazAqparat tilshisi.

Búgin qaladaǵy ortalyq alań adamǵa lyq toly. Jınalǵan qaýymǵa merekelik kontsert qoıylýda. Sondaı-aq kıiz úıler tigilip, turǵyndarǵa Naýryz kóje men baýyrsaq berilýde. Alańdarda sporttyq saıystar da ótip, sándik-qoldanbaly óner jármeńkesi uıymdastyrylǵan.

Qala turǵyndaryn Shyǵys Qazaqstan oblysynyń ákimi Danıal Ahmetov kelip quttyqtady.

«Naýryz – bul tek jańa jyldyń sımvoly ǵana emes, sonymen birge molshylyq merekesi. Prezıdent Qasym-Jomart Toqaevtyń bastamasymen Semeı aımaǵynda Abaı oblysy qurylatyn boldy. Bul Qazaqstannyń rýhanı ortalyǵyna ekonomıkalyq turǵyda ǵana emes, basqa da salalarda qarqyndy damýyna jol ashady. Bizdiń jalǵyz ǵana Otanymyz bar – ol Qazaqstan. Beıbitshilik pen kelisim – basty qundylyqtarymyz. Árbir otbasyna baqyt pen sáttilik tileımin. Naýryz merekesi qutty bolsyn!», - dedi ol.

Aımaq basshysy semeılikterdi memlekettik nagradalarmen marapattady. Atap aıtqanda, QR Prezıdentiniń Jarlyǵy boıynsha oblystyq №1 mamandandyrylǵan balalar-jasóspirimder olımpıadalyq rezervi sport mektebiniń dırektory Mereıǵaly Kóshkinov «Parasat» ordeniniń ıegeri atandy.

«Qurmet» ordenimen qalalyq máslıhat hatshysy Beısenbek Aqjalov jáne Tarbaǵataı aýdany Imashev atyndaǵy balalar men jasóspirimder sport mektebiniń jattyqtyrýshysy Baqytómir Sholǵumbaev marapattaldy. «Shapaǵat» medali R.Baıseıitov atyndaǵy Semeı qarjy-ekonomıkalyq kolledjiniń stýdenti Mereıbek Maǵabilovke jáne Zaısan aýdanynyń Eńbek eri Raısa Shotaevaǵa berildi.

Aıta keteıik, Ulystyń uly kúnine arnalǵan sharalar keshke deıin jalǵasady. Saǵat 21:00-de jurtshylyq merekelik otshashýdy tamashalaıdy.