Semeıde Naýryz merekesinde 5 myń baýyrsaq tegin taratyldy

SEMEI. QazAqpart - Semeı halqy Naýryz merekesin keńinen atap ótti. Merekelik is-sharalar qalanyń bes birdeı alańynda ótip, 20-ǵa jýyq kıiz úı ornatyldy, dep habarlaıdy QazAqparat Semeı qalasynyń aqparattyq ortalyǵyna silteme jasap.

Mereke kórkem ujymdar daıyndaǵan merekelik kontsertpen bastaldy. Óner ujymdary ózderiniń qazaq halqynyń salt-dástúrlerine negizdelgen qoıylymdaryn kórsetti. Qala turǵyndary qoıylym barysynda búrkitshiler men ańshylardyń ónerin de tamashalaı aldy.

Mereke barysynda qala turǵyndary Naýryz kójeden dám tatyp, 5 myńǵa jýyq baýyrsaq tegin taratyldy. Úlken kólemdegi ulttyq qazaq taǵamyn 150 áje ázirlegen.

«Jańarý men jasampazdyq bastaýy, yrys pen yntymaqtyń arqaýy bolǵan Naýryz merekesi barshamyzǵa qutty bolsyn!. Dana halqymyz bul kúni bir-birine amandyq tilep, keler kúnge zor úmit artqan. Jańa kún elimizge tek jaqsylyq ákelsin», - dedi qala ákimi Ermak Sálimov.