Semeıde múgedek jandardy saılaý ýchaskelerine tasymaldaıtyn 11 arnaıy kólik bólinedi

SEMEI. QazAqparat – Semeı qalasynda prezıdent saılaýynda múmkindigi shekteýli jandar óz daýystaryn berýi úshin 11 arnaıy kólik bólinedi, dep habarlaıdy QazAqparat tilshisi.

Qala ákimdiginiń málimetine súıensek, Semeıde múmkindigi shekteýli jandar ózderiniń konstıtýtsııalyq quqyqtaryn paıdalanyp, daýys berýi úshin tıisti jaǵdaı jasalady.

«Saılaý barysynda múgedektigi bar saılaýshylardyń jaǵdaıy tolyq qarastyrylý kerek. Qaladaǵy saılaý ýchaskelerine kelgender qulaqqaptar, Braıl qarpinde saılaý týraly aqparaty bar arnaıy papka, qosymsha jaryqtandyrý, ulǵaıtqyshtar jáne sýrdoaýdarmamen qamtamasyz etiledi. Sonymen qatar múgedektigi bar saılaýshylarǵa qala boıynsha 11 arnaıy kólik bólinedi. Olar saılaýshylardy úıinen saılaý pýnktine jetkizedi, – deıdi Semeı qalasynyń aýmaqtyq saılaý komıssııasynyń tóraǵasy Zeınolla Toqaev.

Sondaı-aq 20 qarasha kúni Semeı boıynsha koǵamdyq kólikter turǵyndardy tegin tasymaldaıdy.