Semeıde múgedek áıel tútinge ýlanyp, kóz jumdy
SEMEI. QazAqparat - Semeıde jekemenshik úıden shyqqan órt saldarynan 60 jastaǵy ekinshi toptaǵy múgedek áıel kóz jumdy. Taǵy eki adam kók tútinge ýlanyp, aýrýhanaǵa tústi. Bul týraly QazAqparat qalalyq TJB baspasóz qyzmetine silteme jasap habarlaıdy.
Oqıǵa qarashanyń 28-i kúni «Holodnyı Klıých» kentindegi jeke sektordaǵy úılerdiń birinde tirkeldi. Qutqarýshylar tilsiz jaýdy sóndirý kezinde úı ishinen 60 jastaǵy ekinshi toptaǵy múmkindigi shekteýli áıeldi alyp shyǵyp, jedel járdem qyzmetkerlerine tapsyrdy. Alaıda, dárigerler áıel adamdy aman alyp qala almady. Qutqarýshylarǵa kelgenge deıin kók tútinge ýlanyp, kóz jumǵanyn anyqtady.
Aldyn ala boljam boıynsha qaıǵyly jaǵdaıdyń oryn alýyna órt qaýipsizdik erejeleriniń saqtalmaýy sebep bolǵan. Qazir mamandar órttiń naqty shyǵý sebepteri men shyǵyn kólemin anyqtap jatyr. Jalpy tilsiz jaýdy aýyzdyqtaýǵa 3 arnaıy tehnıka men 10 qutqarýshy jumyldyryldy.
Sonymen qatar, kók tútinnen taǵy 34 jáne 40 jastaǵy qala turǵyndary zardap shekti. Der kezinde medıtsınalyq kómek kórsetilip, qazir aýrýhanada em qabyldap jatyr.
«Qarapaıym qaýipsizdik sharalaryn barlyǵy da biledi. Degenmen, sonda da ýlanyp jatyr. Jalpy jyl basynan beri Semeıde 409 órt tirkeldi. Saldarynan 10 adam kóz jumǵan. 263 adam qutqaryldy. Onyń 56-sy - bala. Al 30-ǵa jýyq adam kók tútinge ýlandy»,-dedi baspasóz qyzmetinen.
