Semeıde muǵalimderdiń 70 paıyzǵa jýyǵy vaktsına alǵan
SEMEI. QazAqparat – Semeı qalasynda muǵalimderdiń 68 paıyzy COVID-19 ınfektsııasyna qarsy vaktsına aldy, dep habarlaıdy QazAqparat tilshisi.
ShQO ákimi baspasóz qyzmetiniń málimetine súıensek, aımaq basshysy Danıal Ahmetov Semeı qalasynda jańadan taǵaıyndalǵan ákim Baqytjan Baıahmetovpen jáne depýtattarmen jınalys ótkizip, birqatar máseleni talqylady. Jıyn barysynda jaqyn arada atqarylýy tıis jumystardyń jospary belgilendi.
«Depýtattar vaktsınatsııalaý protsesin jandandyrýǵa atsalysýlary kerek. Sebebi, Semeıde bul protsess baıaý júrip jatyr. 1 qyrkúıekke deıin barlyq muǵalim vaktsına alýy tıis. Óıtkeni olar balalarmen tikeleı jumys isteıdi. Al búgingi tańda pedagogtardyń 68%-y ǵana vaktsına alyp otyr», - dedi Danıal Ahmetov.
Sondaı-aq shahardy jylýmen qamtamasyz etý máselesi de sóz etildi. Qazir Semeıdegi barlyq qazandyqty jóndeý jáne rekonstrýktsııalaýdan bólek, olardyń qýatyn arttyrý boıynsha da jumys júrgizilýde.
«Qalany damytý jumystaryn jalǵastyramyz. 1200 jáne 300 oryndyq eki jańa mekteptiń qurylysy júrip jatyr. El prezıdenti Qasym-Jomart Toqaevtyń tapsyrmasy boıynsha Semeı ıadrolyq polıgonyndaǵy synaqtan zardap shekken azamattar úshin ońaltý ortalyǵynyń qurylysy da bastalady. Sonymen qatar Beıbitshilik aralyn qaıta jańǵyrtý jobasy ázirlenetin bolady. Ol jer qala turǵyndary demalyp qana qoımaı, sportpen shuǵyldanatyn orynǵa aınalýy tıis», - dedi oblys ákimi.
Jergilikti jurt úshin mańyzdy taǵy bir joba – avtokólik kópirin jóndeý. Danıal Ahmetov jańa ákimge depýtattarmen birge asfalt tóselmegen joldary bar kóshelerdi jóndeý jóninde aýqymdy baǵdarlama ázirleýdi tapsyrdy.
