Semeıde monshada órt shyǵyp, 30 adam evakýatsııalandy
SEMEI. QazAqparat – Semeı qalasynda monshada órt shyǵyp, 30 adam evakýatsııalandy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Krasın kóshesinde ornalasqan birqabatty monshany qyzyl jalyn sharpyǵan. Oqıǵa ornyna órt sóndirýshiler shuǵyl kelip jetti.
«Olar birinshi kezekte qatty tútindengen aımaqtan 30 adamdy, onyń ishinde 10 balany evakýatsııalady. Kóp uzamaı jalpy aýdany 15 sharshy metrdi quraǵan tilsiz jaý aýyzdyqtalyp, onyń ary qaraı taralýyna jol berilmedi. Qaza bolǵandar men zardap shekkender joq. Órtti sóndirýge barlyǵy jeke quramnan 15 adam jáne 4 tehnıka jumyldyrylǵan», - dep habarlady vedomstvo ókilderi.
Qazirgi ýaqytta, zerthana mamandary jalynnyń shyǵý sebebin anyqtap jatyr.
