Semeıde mıllıondardy jymqyrǵan qarjy pıramıdasyn qurǵan áıel sottaldy
ASTANA. QazAqparat - Semeı qalasynyń №2 sotynda arnaıy jeli qurǵan iri ınvestıtsııalyq pıramıdanyń jetekshisiniń isi boıynsha atyshýly protses aıaqtaldy. Júıege eki myńnan astam adam tirkelip, ondaǵan mıllıon teńge aınalymda bolǵan, dep habarlady YK-news.kz.
Atalmysh iste negizgi adam ShQO týmasy Almıra Esenbaeva (aty-jóni ózgertildi). Semeı turǵyny, biraq Aqtóbede tirkelgen. 2014 jyly qurbysy Sabına Aqbolına ekeýi Aqtóbedegi veb-stýdııaǵa saıt qurý, qoldaý jáne qyzmet kórsetý týraly tapsyryspen júginedi. Bul veb-resýrs Esenbaevanyń bıznesi retinde qurylǵan qarjy pıramıdasynyń qurylýyna negiz boldy. Saıtta ornalasqan jaǵdaıǵa sáıkes pıramıdanyń qatysýshysy osy ınternet-alańǵa tirkelip, Esenbaevanyń esepshotyna 55 myń teńge aýdarady jáne ol shaqyrǵan adamnan keıingi rettik orynǵa ornalastyrylady.
Óz kezeginde, jańa qosylǵan adam aqsha tóleıtin eki adam taýyp, taǵy eki adamdy shaqyrady, salymshy alty adam jınaǵanda, qatysýshy 180 myń teńge syılyq alady. Oǵan 125 myń teńgesi berilip, qalǵan aqsha baǵdarlamaǵa qaıta qatysý quqyǵymen ınvestıtsııa retinde júıede qalady.
2015 jyly Aqbolına mezgilsiz qaıtys bolyp, Esenbaeva isti jalǵastyra beredi. Klıentterdi tartý úshin avtomobıl oınatylady dep ýáde etken. Tergeý derekterine sáıkes eki jylda júıege 70 mıllıonnan astam qarajat tartylǵan. Saıtta eki myńnan astam paıdalanýshy tirkelgen.
2016 jyly Almıra Esenbaev ustaldy. 30 adam jábirlenýshi dep tanyldy, alaıda olardyń basym bóligi shyǵynnyń ornyn toltyrǵanyn habarlady. Sondaı-aq keı jábirlenýshiler onyń eki jasqa tolmaǵan qyzy bar bolǵandyqtan, Esenbaevany sottamaýdy ótindi. Esenbaevany múlkin tárkileýmen bes jylǵa bas bostandyǵynan aıyrdy. Raqymshylyq boıynsha merzim eki esege qysqartyldy.
Almıra Esenbaevaǵa úkim shyqqannan eki aı buryn QR Bas prokýratýrasy Qazaqstan aýmaǵynda jumys istegen «Questra Holdings Inc» kompanııasyna qatysty Qyzylorda oblysynda qylmystyq is qozǵalǵanyn habarlady. Ashyq derekkózderdiń derekterine sáıkes kompanııa Brıtan Vırgın araldarynda tirkelgen. Keńsesi Ispanııada ornalasqan. Qyzmet alańy burynǵy KSRO aýmaǵyna taraǵan. Adamdarǵa jobaǵa aqsha salyp, kiris tabý usynylǵan.
Qarjy pıramıdasy - alǵashqy qatysýshylar keıinnen jazylǵan salymshylar esebinen tabys alatyn qurylym. Mundaı jobalardyń qyzmetine Qazaqstanda tyıym salynǵan. Pıramıdany jarnamalaǵany úshin 3000 AEK aıyppul salynady. Investıtsııalyq qurylymdy qurý jáne oǵan jetekshilik etý 3 jyldan 7 jylǵa deıin bas bostandyǵynan aıyrýdy ne 3000 AEK kóleminde aıyppul tóletýdi qarastyrady. Eger pıramıdaǵa memlekettik qyzmetshi jetekshilik etse, ol 12 jylǵa sottalady.
