Semeıde meıramhana órtendi
SEMEI. QazAqparat - Semeı qalasynda meıramhanalardyń birinde órt bolyp, 30 adam evakýatsııalandy, dep habarlaıdy QazAqparat oblystyq TJD-nyń baspasóz qyzmetine silteme jasap.
«Oqıǵa jeksenbi, 4 qarasha kúni Petrov qıylysyndaǵy 2 qabatty meıramhanada boldy. Ǵımarat jeke ornalasqan. Birinshi qabattaǵy as úıde, ydysta maı tutanǵan. Jalyn ıis sorǵysh júıemen joǵary kóterilip, nysan shatyrynyń aǵash konstrýktsııalary jana bastaǵan. Órt sóndirýshiler birneshe mınýttyń ishinde jetip, 30 adamdy syrtqa shyǵardy. Jalyn birden úsh jerden sóndirilip, tolyqtaı aýyzdyqtaldy. Zardap shekkender joq», - dedi vedomstvodan.
Órt 100 sharshy metr aýmaqty sharpyǵan. Onyń shyǵý sebebi, kináli adamdar men keltirilgen zalal anyqtalyp jatyr.
