Semeıde metall óńdeıtin tseh órtendi
SEMEI. QazAqparat – Semeı qalasynda metall óńdeıtin tseh órtendi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 10 tamyz kúni saǵat 07:37 shamasynda shahardaǵy JShS-lardyń birinde órt shyqqany jaıly habar túsken. Belgili bolǵandaı, metall óńdeıtin tsehty jalyn sharpydy.
«Qutqarýshylar oqıǵa ornyna kelgen kezde kıim aýystyratyn bólmedegi aǵash shkaftar janyp jatty. Sondaı-aq tsehtyń ishin tútin tumshalap alǵan. Órt sóndirýshiler kóp uzamaı 30 sharshy metrge jaıylǵan tilsiz jaýdy tolyqtaı aýyzdyqtady», - dep habarlady vedomstvo ókilderi.
Órttiń shyǵý sebebi – elektr jabdyqtarynyń apattyq rejıminen nemese órt qaýipsizdigi talaptarynyń saqtalmaýynan bolýy múmkin.
