Semeıde menıngıt juqtyrǵan eki sábı aýrýhanaǵa tústi
SEMEI. QazAqparat - Semeıde serozdy menıngıt juqtyrǵan eki balabaqsha tárbıelenýshisi aýrýhanaǵa jatqyzyldy, dep habarlaıdy QazAqparat.
Semeıde serozdy menıngıt dıagnozymen ınfektsııalyq aýrýhanaǵa 4 jastaǵy eki búldirshin tústi. Olar qaladaǵy «Juldyz-Ardaq» balabaqshasynyń tárbılenýshileri. Dárigerlerdiń aıtýynsha, balalardyń syrqattary qaýipti emes. Qazir bireýi statsıonarlyq em qabyldap jatsa, emdelýshiniń ekinshisi úıine shyǵarylǵan.
«Balalar ınfektsııalyq aýrýhanasyna menıngıt dıagnozymen 25 qazannan beri atalǵan balalabaqshanyń úsh balasy tústi. Olardyń ekeýinen dárigerler qoıǵan dıagnoz naqtylandy. Al úshinshi bala respıratorly vırýstyq ınfektsııa juqtyrǵan. Balalarǵa qajetti em kórsetilýde. Ómirlerine tónip turǵan qaýip joq»,-dedi qalanyń bas sanıtarlyq dárigeri Elvıra Isabaeva.
Qazir ata-analar balabaqshany karantınge jabýdy talap etýde. Alaıda balabaqsha basshylyǵy karantınge Qoǵamdyq densaýlyq saqtaý basqarmasynyń ruqsatynsyz jeke sheshim qabyldaı almaıtynyn aıtty. Qazir mektepke deıingi mekemege tolyq dızenfektsııa jumystary júrgizilgen. Dárigerler ata-analarǵa alańdaýǵa esh negiz joq dep otyr.
Jalpy Semeıde jyl basynan beri serozdy menıngıttiń 51 oqıǵasy tirkelgen.
