Semeıde memlekettik-jekeshelik seriktestik aıasynda jańa balabaqsha ashyldy
SEMEI. QazAqparat - Semeı qalasynda memlekettik-jekeshelik seriktestik aıasynda 280 balaǵa arnalǵan «Órleý» balabaqshasy salyndy, dep habarlaıdy «QazAqparat» HAA.
Balabaqshada memlekettik tilde oqytatyn 12 top bolmaq. Onda 2-6 jas aralyǵyndaǵy bóbekter mýzyka, sport zaldaryna baryp, aǵylshyn jáne orys tilderin oqıdy, sporttyq úıirmelerge qatysady.
Pedagogtar etnopedagogıka, ekologııa, til damytý, jazý jáne matematıka boıynsha qosymsha baǵdarlamalar ázirlegen. Toptarǵa zamanaýı jıhaz, damytatyn oıyndar, ınteraktıvti oıynshyqtar jáne kórkem ádebıet qoıylǵan. Munda muqtaj balalardyń da bilim alyp, tárbıelenýine jaǵdaı jasalǵan.
Mektepaldy bilim mekemesine barǵan oblys ákimi Danıal Ahmetov ony Nıý-Iork qalasynyń balabaqshasymen salystyrdy.
«Men Nıý-Iork qalasynda boldym, onda balabaqshaǵa barǵan bala úshin aı saıyn 1100 dollar tólenedi, biraq bóbekterdiń oınaıtyn, uıyqtaıtyn bólmesi kishkentaı. Bizdegi bólmeler keń, oqý, oınaý úshin barlyq jaǵdaı jasalǵan. Semeı bıznesmenderi barlyq kásipkerlerge úlgi bolyp otyr. Olar óz qarajatyna eki balabaqsha salyp úlgerdi, alda kútip turǵan jumys kóp», - dep atap ótti oblys ákimi.
