Semeıde memleket múlkin zańsyz ıemdengen áskerı qyzmetker sottaldy
SEMEI. QazAqparat - Semeıde áskerı bólimniń múlkin ıemdenip, talan-tarajǵa salǵany úshin áskerı qyzmetshi sottaldy, dep habarlaıdy QazAqparat.
Semeı garnızony áskerı soty kóshpeli sot otyrysynda áskerı qyzmetshige qatysty qylmystyq isti qarady.
Sot anyqtaǵandaı, áskerı qyzmetshi laýazymdy tulǵa bola otyryp, qyzmet babyn paıdalanyp, birneshe ret ózine senip tapsyrylǵan múlikti ıemdengen. Osylaısha, jábirlenýshige 346 157 teńge materıaldyq shyǵyn keltirgen. Sonymen qatar, ol ózine paıda keltirý maqsatynda, resmı qujattarǵa, ıaǵnı vedomostvo, aktilerge, júkqujattarǵa kórineý jalǵan málimetterdi engizgen.
Sot úkimimen áskerı qyzmetshi ómir boıyna memlekettik qyzmette laýazymdy qyzmet atqarý quqyǵynan aıyryldy. Jáne oǵan QR QK 189-baby boıynsha - 2 jyl, 369-baby 1-bólimi boıynsha - 1 jyl bas bostandyǵyn shekteý jazasy taǵaıyndaldy.
«QR QK 58-babynyń 3-bólimi, ıaǵnı qylmystyq quqyq buzýshylyqtar jıyntyǵy boıynsha jaza taǵaıyndaý negizinde naqty jaza retinde 2 jyl bas bostandyǵynan shekteý jazasy taǵaıyndaldy. Sonymen qatar, «kapıtan» áskerı ataǵynan aıyryldy»,-dep málim etti Semeı garnızony áskerı sotynyń baspasóz qyzmetinen.
