Semeıde mektep oqýshylaryn tasymaldaıtyn avtobýstar qurastyrylýda
SEMEI. QazAqparat – Semeı qalasyndaǵy zaýytta mektep oqýshylaryn tasymaldaıtyn avtobýstar qurastyrylýda, dep habarlaıdy QazAqparat tilshisi.
Shyǵys Qazaqstan oblysynyń ákimi Danıal Ahmetov kóp uzamaı óńir mektepteri arnaıy avtobýstarymen qamtamasyz etiletindigin aıtty. Qoǵamdyq kólikterde sómke qoıatyn oryn, qaýipsizdik beldikterimen jabdyqtalǵan balalar oryndyqtary bolady.
«Osyǵan deıin óńirdegi medıtsınalyq mekemelerge jedel járdem kólikterin shyǵarǵan «SEMAZ» JShS bizdiń ótinishimizdi jerde qaldyrmady. 20 oqýshyǵa arnalǵan avtobýstyń jańa nusqasy daıyndaldy. Jaqyn arada birneshe avtobýs satyp alamyz. Qazir Bilim basqarmasy mektepterge naqty qansha kólik kerek ekenin eseptep jatyr. Eń bastysy, bul jaıly qoǵamdyq kólikter balalarymyzdyń qaýipsizdigin qamtamasyz etedi», - dedi Danıal Ahmetov.
Esterińizge sala ketsek, osyǵan deıin ShQO-nyń medıtsınalyq mekemelerine 60 jedel járdem kóligi berilgendigi habarlanǵan.
