Semeıde mektep oqýshysy synyptasyn pyshaqtady
SEMEI. KAZINFORM — Semeı qalasynda eki oqýshy arasynda kıkiljiń shyǵyp, biri ekinshisine pyshaq suqqan.
Abaı oblysy polıtsııa departamentiniń málimetine súıensek, 10 qyrkúıek kúni polıtsııaǵa dene jaraqattarymen eki adamnyń aýrýhanaǵa jatqyzylǵany týraly habarlama túsken.
— Atalǵan fakti boıynsha sotqa deıingi tergep-tekserý júrgizilip jatyr. Sonyń barysynda bolǵan oqıǵanyń barlyq mán-jaıy anyqtalýda. Tergeý qorytyndysy boıynsha kámeletke tolmaǵandardy profılaktıkalyq esepke qoıý, olardyń zańdy ókilderin balalardy tárbıeleý jónindegi mindetterin tıisinshe oryndamaǵany úshin jaýapkershilikke tartý máselesi de qaralady, — dep habarlady departamenttiń baspasóz qyzmetinen.
Vedomstvo dereginshe, túpkilikti protsestik sheshim tergeý nátıjelerinen keıin qabyldanady.
Beıresmı málimetterge súıensek, bir synypta oqıtyn eki oqýshynyń arasynda kıkiljiń shyqqan. Sol kezde biri ekinshisine pyshaq jaraqatyn keltirgen.
Eske salaıyq, osyǵan deıin Túrkistanda áıelin pyshaqtap óltirdi degen kúdikpen er adam qamaýǵa alynǵanyn habarlaǵanbyz.
