Semeıde Medıtsına ýnıversıtetiniń stýdentterine 1000 oryndyq jataqhana salynady
SEMEI. QazAqparat - Shyǵys Qazaqstan oblysynda stýdentterge bólinetin grant sany artqan. Mysaly, ótken jyly ákimdik stýdentterdiń tegin bilim alýy úshin 200 grant bólse, bıylǵy jyly 400 grant bólgen, dep habarlaıdy QazAqparat.
Búgin ShQO aktıvi Elbasynyń «Bes áleýmettik bastamasyn» talqylady. Jıynda oblystyq bilim berý basqarmasy bastyǵynyń orynbasary Aıgúl Baıjanova byltyr oblys boıynsha 2411 grant bólingenin jetkizdi. Al oblys ákimdigi óz qarajaty esebinen bıyl ekinshi jyl qatarynan suranysqa ıe mamandardy daıyndaý úshin grant bóldi.
«Bıylǵy jyly aldyn-ala esep boıynsha tehnıkalyq mamandardy daıarlaýǵa, onyń ishinde IT mamandaryna 200 oryn bólinetin bolady. Sondaı-aq pedagogıkalyq kadrlardy oqytý úshin bıýdjettik oryndar qurylady. Onyń ishinde aǵylshyn tilin biletin jaratylystaný tsıkliniń muǵalimderine. Bul agroónerkásiptik keshen men medıtsına qyzmetkerlerine de qatysty», - dedi A.Baıjanova.
Sonymen qatar Elbasy óz úndeýinde stýdentterdiń ómir súrý jaǵdaıyn jaqsartýdy tapsyrdy. Búginde Semeı qalasyndaǵy Medıtsına memlekettik ýnıversıtetiniń 1000 oryndyq jataqhanasynyń qurylysy bastaldy jáne aǵymdaǵy jyldyń qyrkúıek aıynda «Qazaqstan-Amerıkandyq» erkin ýnıversıteti (KASÝ) Óskemende 160 oryndyq jataqhana salýdy josparlap otyr.
Aıgúl Baıjanova sondaı-aq tehnıkalyq jáne kásiptik bilim berý salasynda oqyp jatqan 1000 stýdentke de bólmeler kerek ekenin atap ótti.
«Bul máseleni sheshý jastardyń qarjylyq jaǵdaıyn jaqsartyp qana qoımaı, aımaqtaǵy joǵary oqý oryndarynyń básekege qabilettiligin arttyrady», dedi óz sózinde.
