Semeıde mas júrgizýshini toqtatý úshin oq atýǵa týra keldi

SEMEI. KAZINFORM - Semeı qalasynda mas kúıde kólik tizginine otyrǵan er adam polıtseılerden qashyp qutylmaq boldy.

19 qyrkúıekte túngi saǵat 01.00 shamasynda polıtsııaǵa habarlasqan adam Óskemen kóshesimen zýyldap kele jatqan evakýator júrgizýshisiniń mas bolýy múmkin ekeni týraly aıtqan.

- Sol jerge qaraı attanǵan «Barys 615» patrýldik polıtsııa ekıpajy evakýatordy baıqap, júrgizýshini toqtatady. Alaıda ol baǵynbaı, ary qaraı júrisin jalǵastyryp, jaıaý júrginshiler men basqa kólikterge qaýip tóndirgen, - dep habarlady Abaı oblysy Polıtsııa departamentinen.

Polıtseıler evakýatordyń sońyna túsip, qýa ketken. Júrgizýshi túrli manevr jasap, qashyp qutylmaq bolǵan.

- Ony toqtatý úshin polıtseılerdiń biri eskertý úshin aldymen aýaǵa oq atady. Odan nátıje bolmaǵannan keıin kóliktiń dóńgelegine oq jaýdyrady. Dóńgelekteri tesilgennen keıin ǵana evakýator toqtady, - delingen aqparatta.

Tizginde 29 jastaǵy semeılik turǵyn bolǵan. Medıtsınalyq saraptama onyń orta deńgeıde mas bolǵanyn kórsetti. Júrgizýshi aıyqtyrǵyshqa jetkizilip, evakýator arnaıy turaqqa qoıyldy.

Eske salsaq, osyǵan deıin Almatyda granıt plıtalardy urlaý deregi boıynsha qylmystyq is qozǵalǵany habarlanǵan.