Semeıde «Máńgilik alaýǵa» aıaq siltegen jasóspirimderdiń ata-anasy jaýapqa tartyldy

SEMEI. QazAqparat – Semeı qalasynda «Máńgilik alaýǵa» aıaq siltegen jasóspirimderdiń ata-anasy jaýapqa tartyldy, dep habarlaıdy QazAqparat tilshisi.

Áleýmettik jelide Semeıdegi «Máńgilik alaýdy» aıaqpen taptap, memorıaldy qorlaǵan jasóspirimderdiń vıdeosy tarady. 26 jeltoqsanda Abaı oblystyq Polıtsııa departamentiniń baspasóz qyzmeti vandaldardyń kim ekendigi anyqtalǵanyn málim etti.

«Bul derek birden ortalyq polıtsııa basqarmasynyń tirkeý kitabyna engizilgen. Vıdeodaǵy adamdar anyqtaldy, olar 14-15 jas aralyǵyndaǵy 3 jasóspirim bolyp shyqty. Ata-analaryna QR ÁQBtK-niń 435-baby (Buzaqylyq) boıynsha ákimshilik hattama toltyryldy», - delingen aqparatta.

Vedomstvo dereginshe, bul quqyq buzýshylyq protsessýaldyq sheshim qabyldaý úshin mamandandyrylǵan ákimshilik sotqa jiberiledi. Osy bapqa sáıkes 7 AEK mólsherinde ákimshilik aıyppul qarastyrylǵan.