Semeıde qyzyl jalyn jer úı, sharýashylyq qora-jaı men kólikti sharpyǵan
SEMEI. QazAqparat – Semeı qalasynda shyqqan órt jeke turǵyn úıge, sharýashylyq qora-jaılar men avtokólikke jaıylǵan, dep habarlaıdy QazAqparat tilshisi.
Qalalyq tótenshe jaǵdaılar basqarmasy baspasóz qyzmetiniń málimetine súıensek, 5 maýsym kúni saǵat 04.25-te Mýsınov kóshesindegi sharýashylyq qora-jaıda órt shyqqany týraly habar túsken. Tilsiz jaý sol mańaıdaǵy jer úıge de lezde tarap ketti.
«Órt sóndirýshiler birden oqıǵa ornyna attandy. Aryny basylmaǵan ot kórshiles úı shatyrynyń aǵash qurylymdaryna, plastık terezege, garajǵa jaıyla bastaǵan. Joǵary temperatýradan garaj ishindegi Daewoo Gentra avtokóligin de jalyn sharpydy. Órtti sóndirýge 7 tehnıka men jeke quramnan 28 adam jumyldyrylǵan», - dep habarlady vedomstvo ókilderi.
Tilsiz jaý saǵat 06.05-te tolyqtaı sóndirildi. Onyń jalpy aýdany 140 sharshy metrdi quraǵan.
Órttiń shyǵý sebebi – otty abaısyz paıdalanýdan nemese elektr jabdyqtaryn ornatý jáne paıdalaný kezinde órt qaýipsizdigi erejelerin saqtamaýdan bolýy múmkin.
