Semeıde qys mezgiline 92 tehnıka men 4 myń tonnadan astam ınertti materıal ázirlendi

SEMEI. QazAqparat – Semeı qalasynda aldaǵy qys mezgiline 92 kommýnaldyq tehnıka men 4 myń tonnadan astam ınertti materıal ázirlendi, dep habarlaıdy QazAqparat tilshisi.

Semeıde aldaǵy qysqa kommýnaldyq tehnıkany daıyndaý jumystary aıaqtaldy. Qala kóshelerin kútip-ustaý, qar men kóktaıǵaq kezinde kólik qozǵalysynyń qaýipsizdigin qamtamasyz etý úshin 92 mamandandyrylǵan tehnıka, 4000 tonnadan astam ınertti materıal jáne 2500 tekshe metr qum-tuz qospasy daıyndaldy.

«Qalyń qar jaýǵan kezde jumys kúshi men tehnıkanyń sany qajettilikke qaraı artyp otyrady. Qysqy kútip-ustaý jumystaryna – kóshelerdi qardan tazartý, jol jıekterinen, betkeılerden qar úıindilerin alý, qıylystardy, aıaldamalardy, kólik toqtaıtyn jerlerdi, trotýarlardy tazartý jumystary kiredi», - delingen aqparatta.

Jalpy qala boıynsha sanıtarlyq tazalaýǵa arnalǵan aýmaqqa – uzyndyǵy 756 shaqyrymdy quraıtyn 1179 kóshe, 11 skver jáne 9 saıabaq kiredi.