Semeıde qylmystyq dálelderdi qoldan jasaǵan tergeýshi sottaldy
ÓSKEMEN. QazAqparat - Semeıde jumys kórsetkishin joǵarylatý úshin qylmystyq is dálelderin qoldan jasaǵan tergeýshi sottaldy, dep habarlaıdy «QazAqparat» HAA tilshisi qalalyq sottyń baspasóz qyzmetine silteme jasap.
Іs materıaldarynde kórsetilgendeı, 25 jastaǵy polıtsııa leıtenanty Ádiljan N. óziniń tanysynan uıaly telefon urlanyp, onyń lombardqa tapsyrylǵanyn estıdi.
Polıtseı bul isti «jyldam ashýdyń» jolyn oılap tabady. Eki kúnniń ishinde qylmystyń betin ashýdy kózdegen tergeýshi dálelderdi qaǵaz betinde qoldan jasaı bastaǵan.
Aldymen ol basqa is boıynsha tergelip jatqan kúdiktiden telefon joǵaltqan adam bolyp aryz jazyp «jábirlenýshige» aınalýdy suraıdy. Tergeýdegi adam bul qýlyqqa kelispegen. Biraq polıtseı ony aldap aryz jazdyryp alady. Polıtseıdiń qýlyǵy budan keıin tipti kúrdelene túsedi. Ol óziniń «ıeligindegi» qylmyskerdiń birine telefonnyń ıesi tabylǵanyn aıtyp, urlyq boıynsha qol qoıdyryp alady.
Tártip saqshysy budan soń lombardqa baryp, telefon ıesiniń tabylǵany týraly dáleldermen kepilde turǵan zatty tárkilep alǵan. Budan soń taraptardyń ózara kelsimimen qylmystyq istiń toqtatylǵany týraly qaýly shyǵarady. Alaıda «ashylǵan» qylmystyq is belgisiz sebeptermen prokýratýra maquldanýyna jiberilmegen. Polıtseıdiń ótirigi osy jerden shyǵyp qalady.
Sot N. Ádiljandy QR QK 416-baby, 4-bóligi boıynsha kináli dep tanyp, oǵan 500 AEK (1 mln. 135 myń teńge) kóleminde aıyppul saldy. Sonymen birge polıtseıdiń sheni tómendetilip, 2 jyl ýaqyt quqyq qorǵaý organdarynda jumys isteýge tıym saldy. Eks-tergeýshige sottyń protsessýaldyq shyǵyndaryn jáne belgilengen 500 AEK aıyppuldy tóleýge bir aı ýaqyt berildi.
