Semeıde qutqarýshylar sýǵa ketken balany tabý úshin muzdy arshyp jatyr
ASTANA. QazAqparat - Semeıde qutqarýshylar úsh kúnnen beri sýǵa ketken on jasarlyq balany izdestirip jatyr, dep habarlaıdy Shyǵys Qazaqstan oblystyq TJD-nyń baspasóz qyzmeti.
Keı jerlerde aǵys jyldamdyǵy 2 metr sekýndqa jetetindikten súńgýirler izdestirý jumysyn júrgize almaıdy. Sondyqtan mamandar sý asty kamerasyn paıdalanýda, onyń kórý qashyqtyǵy 3 metr.
Aǵysy joq jerlerge súńgýirler túsip sý astyn qarastyrdy. Osy aralyqta mamandar 20 metr jerdiń muzyn buzdy.
Qazirgi ýaqytta qutqarýshylar aǵystan tómen qaraı 2 shaqyrym jerge ketti. Balanyń qysqy kıimderi izdestirý jumysyn qıyndatýda. Óıtkeni ony aǵys belgisiz qashyqtyqqa aparyp tastaýy múmkin. 
Qazir izdestirýge 8 maman jumyldyrylǵan. Bular ShÓAJQJ (Shyǵys óńirlik aeromobıldi jedel-qutqarý jasaǵy) qutqarýshylary jáne Semeı qalalyq TJB ókilderi. Qutqarýshylarǵa 9 erikti qolǵabys jasap júr.
Eske sala ketsek, oqys oqıǵa jeksenbi kúni Semeı mańynda bolǵan. Eki bala ata-analarynyń baqylaýynsyz muzda oınaǵan. Oıyn barysynda balanyń biri baıqamaı juqa muzǵa shyǵyp, ol oıylyp sýǵa ketken. Ekinshisi eresekterge kómek suraýǵa júgirgen. Alaıda bári kesh edi.
