Semeıde qutqarýshylar otqa oranǵan úıden múgedek adamdy alyp shyqty
SEMEI. QazAqparat – Semeı qalasynda órtengen jer úıden múgedek adam qutqaryldy, dep habarlaıdy QazAqparat tilshisi.
ShQO nótenshe jaǵdaılar departamenti baspasóz qyzmetiniń málimetine súıensek, Semeıdegi Sátbaev kóshesinde shóp órtengen.
Tilsiz jaý lezde jaqyn mańdaǵy jer úıge, monshaǵa, garaj ben sharýashylyq qora-jaılarǵa tarap ketti.
«Sol jerge jyldam kelip jetken órt sóndirýshiler birinshi kezekte jer úıge kirip, 1984 jylǵy múgedek adamdy syrtqa alyp shyqty. Jalynnyń jyldam jaıylýyna qatty jel áser etken. Kóp uzamaı jalpy aýdany 24 sharshy metrdi quraǵan ot aýyzdyqtaldy. 2 gektarǵa taraǵan dala órti de sóndirildi», - dep habarlady vedomstvo ókilderi.
Aıta keteıik, órtpen kúreske 6 tehnıka men jeke quramnan 30 adam jumyldyrylǵan.
