Semeıde qutqarýshylar otqa oranǵan úıden 2 gaz ballonyn alyp shyqty
SEMEI. QazAqparat - Semeı qalasynda qutqarýshylar órtengen jer úıden 2 gaz ballonyn alyp shyqty, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, 7 sáýir kúni saǵat 21.47-de Moldaǵalıev kóshesinde órt shyqqan. Oqıǵa ornyna órt sóndirýshiler kelip jetkende turǵyn úı kireberisiniń aǵash qurylǵylary, qabyrǵalary men tóbesin qyzyl jalyn sharpyp jatty.
«Qutqarýshylar as bólmeden syıymdylyǵy 27 lıtrlik 2 gaz ballonyn syrtqa shyǵaryp úlgerdi. Kóp uzamaı jalpy aýdany 70 sharshy metrdi sharpyǵan jalyn tolyqtaı aýyzdyqtalyp, onyń ary qaraı taralýyna jol berilmedi. Turǵyn úıdiń jalpy aýdany 250 sharshy metrdi quraıdy», - dep habarlady vedomstvo ókilderi.
Órtti sóndirýge jeke quramnan 23 adam men 8 tehnıka jumyldyrylǵan. Ottyń shyǵý sebebi - elektr symdaryn montajdaý jáne paıdalaný kezinde órt qaýipsizdigi talaptaryn saqtamaýdan boldy.
Foto: semeynews.kz
