Semeıde qutqarýshylar qudyqqa túsip ketken sıyrdy shyǵaryp aldy
SEMEI. QazAqparat - Semeıde qalalyq №2 qutqarý jasaǵyna qala turǵyny qońyraý shalyp káriz qudyǵyna túsip ketken sıyryn shyǵaryp berýge kómek suraǵan, dep habarlaıdy QazAqparat tilshisi qalalyq TJB-ǵa silteme jasap.
Oqıǵa qala shetindegi Voshod kentinde bolǵan. Sıyrdyń káriz qudyǵyna qalaı túsip ketkeni belgisiz. Turǵyndar úı janýaryn ózderi shyǵara almaǵan soń qutqarýshylardy kómekke shaqyrǵan. Oqıǵa ornyna №2 jasaqtyń 3 qutqarýshysy kelip jetken. Olar manıpýlıator arnaıy tehnıkanyn kómegimen 30 mınýtta sıyrdy qudyqtan aman alyp shyqty.
«Biz sıyrdy arqan jippen baılap, sonyń kómegimen syrtqa tartyp alyp shyqtyq. Oqys oqıǵadan sıyrǵa eshqandaı zardap kelgen joq», - dedi qutqarýshylar.
Maldyń ıesiniń aıtýynsha sıyr aýlasynda jaıylyp turǵan. Ol jabyq turǵan qudyqtyń ústimen júrgen, al káriz qaqpaǵy sıyrdyń salmaǵyn kótermegen. 
