Semeıde qurylys salasynyń mamandary tapshy - Danıal Ahmetov

ÓSKEMEN. QazAqparat – Semeı qalasynda kópqabatty turǵyn úı salý qarqynynyń artýyna baılanysty qurylys salasynyń mamandary jetispeı jatyr, dep habarlaıdy QazAqparat.

«Osydan tórt jyl buryn belgili qurylysshylardyń birine Semeıde aldaǵy ýaqytta qurylys mamandary tapshy bolatynyn eskertken edim. Mine, sol aıtqanym týra keldi. Biz qazir salynyp jatqan 160 myń sharshy metr turǵyn úıdiń qurylys qarqynyn eki ese arttyra alamyz. Biraq adam jetispeıtindigi buǵan kedergi bolyp tur. Osyndaı tapshylyq tek Semeıde emes, Shyǵys Qazaqstannyń ár óńirinde baıqalady», - dedi Danıal Ahmetov qoǵamdyq keńes aldyndaǵy esebinde.

Osyǵan oraı oblys ákimi bilim jáne qurylys basqarmalaryna aımaq boıynsha salynyp jatqan turǵyn úı kólemine sáıkes qurylys mamandaryn oqytýdy tapsyrdy.

Danıal Ahmetovtyń aıtýynsha, bıyl 10 jańa áleýmettik nysannyń qurylysy bastalmaq. Onyń ishinde Abaı aýdanynyń ortalyǵy - Qaraýyl aýylyndaǵy orta mektep, Glýbokoe aýdanyndaǵy mádenıet úıi, Aıagóz aýdany Aqtoǵaı aýylyndaǵy dene shynyqtyrý-saýyqtyrý ortalyǵy bar.