Semeıde quny 100 mln teńgeden asatyn esirtki tárkilendi

SEMEI. QazAqparat – Semeı qalasynda quny 100 mln teńgeden asatyn marıhýana men gashısh tárkilendi, dep habarlaıdy QazAqparat tilshisi.

Qalalyq Polıtsııa basqarmasy esirtki qylmysyna qarsy is-qımyl jáne krımınaldyq polıtsııa bólimderiniń qyzmetkerleri Jedel áreket etý arnaıy jasaǵymen birlesip aýqymdy operatsııa júrgizdi.

Shara barysynda 44 jastaǵy semeıliktiń kannabıs tobyna jatatyn esirtki zattarynyń asa iri partııasyn satpaq bolǵany anyqtaldy. Tintý kezinde jedel ýákilder 1,5 tsentnerden astam keptirilgen marıhýana men 10 keli gashıshti tárkiledi.

«Sondaı-aq onyń garajynan 153 keliden astam marıhýana tabyldy. Kúdikti esirtkini shahar turǵyndaryna satpaq bolǵan. Tárkilengen esirtki sany 32 myń bir rettik doza. Olardyń «qara naryqtaǵy» baǵasy 100 mln teńge asady», - dedi ShQO PD bastyǵynyń orynbasary Talǵat Shaıahmetov.

Qazirgi ýaqytta kúdikti qamaýǵa alynǵan. Qylmystyq kodekstiń 297-baby 3-bóligine sáıkes sotqa deıingi tergeý amaldary júrgizilýde. Er adam 15 jylǵa deıin bas bostandyǵynan aıyrylýy múmkin.