Semeıde kóterme-taratý ortalyǵy salynyp jatyr
SEMEI. QazAqparat – Semeı qalasynda kóterme-taratý ortalyǵy salynýda, dep habarlaıdy QazAqparat tilshisi.
Búginde shaharda «Jolaman» kóterme-taratý ortalyǵynyń qurylysy qarqyndy júrýde.
Respýblıkalyq taýar óndirýshiler jelisin qurýdyń memlekettik baǵdarlamasy sheńberinde júzege asyrylyp jatqan jobanyń quny – 1,5 mlrd teńge.
«2025 jylǵa qaraı elimizde 20 kóterme-taratý ortalyǵyn salý josparlanýda. Olardyń alǵashqy beseýi bıyl paıdalanýǵa beriledi. Semeıdegi kóterme-taratý ortalyǵynyń jalpy jer kólemi 11 ga. Bul Jolaman kenti aýdanyndaǵy burynǵy «Sary» bazary. Onyń aýmaǵyn «Aqshyń» korporatsııasy satyp alyp, JSQ daıyndap, qurylysy jumystaryn bastady. Qurylysqa kompanııa óz qarajatynan 1,5 mlrd teńge jumyldyrdy. Al 473 mln teńge «Damý» qorynyń qoldaýymen «TsentrKredıt» bankinen nesıe retinde berildi», - dep habarlady qalalyq aqparat ortalyǵy.
Byltyr jazda bastalǵan qurylys jumystary qazirgi ýaqytta aıaqtalýǵa jaqyn. Búgingi kúni onda qýattylyǵy táýligine 50 iri qara mal soıatyn qasaphana jumys isteýde.
Ortalyqtyń qurylysy aıaqtalǵan kezde kóterme-taratý qoımalary, kross-dok, tońazytqysh jáne muzdatqysh kameralar iske qosylady.
Táýelsizdik kúni 200 oryndyq jármeńke uıymdastyrý josparlanǵan. Bul jerde aımaqtaǵy taýaróndirishýler óz ónimderin satatyn bolady.
