Semeıde kóshede myltyqpen júrip, jurttyń úreıin ushyrǵan jigit ustaldy
SEMEI. QazAqparat – Semeı qalasynda kóshede myltyqpen júrip, turǵyndardyń úreıin ushyrǵan er adam ustaldy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, Semeıdegi Zaton polıtsııa bólimine habarlasqan azamat «Radýga» saýda úıiniń mańynda jas jigittiń qolyna myltyq ustap júrgenin aıtty.
Polıtsııa qyzmetkerleri shuǵyl túrde oqıǵa ornyna kelip jetti. Kóp uzamaı olar optıkalyq kózdeýishi bar myltyqqa uqsas zatty ustap júrgen er adamdy kórdi. 17 jastaǵy semeılik bólimshege jetkizildi.
«Tergeý barysynda anyqtalǵandaı, azamat eki kún buryn atap ótken týǵan kúnine oraı ata-anasy bergen aqshaǵa oıynshyq qarý satyp alǵan. Zaton polıtsııa bólimi ıývenaldyq polıtsııa tobynyń qyzmetkerleri zańdy ókilderiniń qatysýymen kámeletke tolmaǵan balamen profılaktıkalyq áńgime júrgizdi. Oıynshyq myltyq týǵan kún ıesine qaıtaryldy», - delingen aqparatta.
