Semeıde kóshede qolyna pyshaq ustap turǵyndardy qorqytqan áıel ustaldy

Semeı qalasynda kóshede qolyna pyshaq ustaǵan áıel adam turǵyndardy qorqytty, dep habarlaıdy QazAqparat tilshisi.

Abaı oblystyq Polıtsııa departamentiniń málimetine súıensek, Semeıdegi Perınataldyq ortalyq mańynda qolyna pyshaqqa uqsaıtyn zat ustaǵan áıel ótip bara jatqan adamdardy qorqytqan.

«Polıtsııa qyzmetkerleri ózderine bekitilgen ákimshilik ýchaskeni aralaý kezinde sol áıeldi baıqady. Azamattardyń tynyshtyǵyn jáne qoǵamdyq tártipti buzǵan 34 jastaǵy qala turǵynyn ustap, polıtsııa bólimine jetkizgen. Sarapshynyń qorytyndysy áıelden tárkilengen zattyń sýyq qarý ekendigin rastady», - delingen aqparatta.

Atalǵan fakti boıynsha QR QK 287-babymen sotqa deıingi tergeý amaldary bastaldy. Oqıǵanyń barlyq mán-jaıy anyqtalyp jatyr.