Semeıde kóshe kezgen elik ustaldy
SEMEI. QazAqparat – Semeı qalasynda kóshe kezip júrgen elik ustaldy, dep habarlaıdy QazAqparat.
Qala turǵyndary elikti 23-inen 24 aqpanǵa qaraǵan túni baıqap qalypty. Jabaıy ań adamdardan qorqyp, qashyp ketken. Alaıda janashyrlyq tanytqan jandar kóp uzamaı elikti ustap alǵan.
«Búginde túz taǵysy Semeıdegi bıologııalyq ortalyqqa jetkizildi. Eliktiń jaǵdaıy tekserilip, eshqandaı jaraqat anyqtalmasa, ol qaıtadan tabıǵı mekenine jiberiledi», - deıdi ortalyq mamandary.
Esterińizge sala ketsek, osyǵan deıin Nur-Sultandaǵy EKSPO jaqta shaýyp júrgen elik vıdeoǵa túsip qalǵan bolatyn. Keıin QR Aýyl sharýashylyǵy mınıstrliginiń Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet jabaıy ańnyń ustalǵanyn aıtqan.
