Semeıde kóshe ataýlary qazaqshalanyp jatyr
SEMEI. QazAqparat - Semeıde Keńestik zamanda oryssha ataýǵa ıe bolǵan kósheler búginde buqaralyq sıpat alyp, halyq bastamasymen ózgeriske ushyrap jatyr, dep habarlaıdy QazAqparat.
Semeıde kóshe ataýlaryn qazaqylandarý máselesi birtindep sheshimin tabýda. Jalpy qalada 1042 kóshe bar. Sonyń tek 382-si ǵana memlekettik tilde. Respýblıkalyq onomastıkalyq komıssııanyń sheshimimen buǵan deıin Lenın kóshesi - Máńgilik El, Polkovnıchıı araly - Beıbitshilik araly, Internatsıonalnyı kóshesi - Qaıym Muhamedhanov, Dalnıaıa - Zakarııa Belibaev kóshesi bolyp ózgergen-di. Endi ıdeologııalyq turǵydan eskirgen taǵy 10 kósheniń ataýyn ózgertý boıynsha qoǵamdyq keńestiń jıyny ótti.
«Kósheler el damýyna zor úles qosqan azamattardyń atymen atalsa, ol da bolashaqqa degen baǵdarymyzdyń birden-bir kórinisi bop esepteledi»,-deıdi jıynda sóz alǵandar.
«Komsomolskaıa kóshesin - Jibek Joly, Kýtýzov kóshesin - Altaı, Kolhoznaıany - Berel, Pervomaıskaıa kóshesin - Alash, 1 dekabr kóshesin - Samal, Dekabrıstov kóshesin - Zvezdnaıa, Voshod kentindegi Týktabaev kóshesin - Sonar atty tarıhı esimge aýystyrý kózdelip otyr. Sondaı-aq Lenınogorskaıa kóshesine Keńes odaǵynyń batyry Muqataı Ábeýlovtyń, Sotsıalıstıcheskaıa kóshesine qalanyń áleýmettik-ekonomıkalyq damýyna úles qosqan eńbek sińirgen memlekettik qaıratker Zarykbek Kýzetaevtyń atyn berýdi onomastıkalyq komıssııa múshelerine usynyp otyrmyz. Eger qabyldasa, ózgeredi», - dedi qoǵamdyq keńes tóraǵasynyń orynbasary Janna Jybraeva.
Sonymen qatar, jıynda qoǵamdyq keńes músheleri Frýnze kóshesine Qazaqstan Respýblıkasy Іshki ister mınıstrliginiń eńbek sińirgen qyzmetkeri, zań ǵylymdarynyń kandıdaty, polıtsııa polkovnıgi Dálelhan Sabýrovtyń esimin berýdi usyndy.
Al buǵan deıin qoǵamdyq keńes músheleri qaladaǵy №1 balalar-jasóspirimder sport mektebine halyqaralyq sport sheberi, qazaqtan shyqqan tuńǵysh Olımpıada chempıony Jaqsylyq Úshkempirovtiń esimin berý týraly usynys jasaǵan. Respýblıkalyq onomastıkalyq komıssııanyń sheshimimen sport mektebine chempıonnyń esimi beriletin boldy.
Foto: altai.kz
