Semeıde koronavırýs juqtyrǵandardyń sany ósýde
SEMEI. QazAqparat – Semeıde koronavırýs ınfektsııasyn juqtyrǵan naýqastar sany artyp keledi, dep habarlaıdy QazAqparat tilshisi.
Bul týraly qalalyq jedel shtab múshesi, medıtsınalyq máseleler jónindegi úılestirýshi Naılıa Álmeneva málimdedi.
«Ótken táýlikte oblysta koronavırýstyń 18 jańa jaǵdaıy tirkeldi, olardyń 9-y Semeıde anyqtaldy. Juqtyrǵandardyń ishinde 8 eresek jáne 4 jasar bir bala bar. Naqtylaı ketsek, solardyń ekeýi polıtsııa qyzmetkeri, 2-i medbıke, 3-i jeke jáne memlekettik kásiporyndardyń qyzmetkerleri, bireýi jumyssyz. Atalǵan 9 jaǵdaı boıynsha 16 ınfektsııa oshaǵy belgilenip, baılanysta bolǵan 100-ge jýyq turǵyndar anyqtaldy», - deıdi ol.
Vırýs juqtyrǵandardyń jartysy turaqty túrde qoǵamdyq kólikke otyryp, jıi saýda oryndary men sýpermarketterge baryp júrgen.
Qalalyq jedel shtabtyń málimeti boıynsha búgingi tańda Semeı qalasynda koronavırýs ınfektsııasyna shaldyǵýdyń 164 jaǵdaıy tirkelgen. Blokbeketter alynǵannan bastap juqtyrǵandardyń sany kún saıyn orta eseppen 8 jaǵdaıǵa artyp keledi. Tirkelgen 100 oshaqta bir jarym myń koronavırýs juqtyrǵan adamdarmen baılanysta bolǵandar baqylaýǵa alynǵan. Qosymsha sımptomsyz retinde 105 juqtyrǵan adam tirkeldi. Qazirgi ýaqytta alty adam aýyr halde jáne ekeýi reanımatsııa palatasynda jatyr.
Ókinishke qaraı, koronovırýspen qatar qosalqy aýrýy anyqtalǵan 4 adam qaıtys boldy.
«Qurmetti jerlester, álemdik ǵylym bul vırýsqa qarsy vaktsınany áli tappady. Ázirge eń tıimdi qorǵanys - qarapaıym qaýipsizdik erejelerin saqtaý. Áleýmettik qashyqtyq, jeke gıgıena, jáne betperde kııý sekildi saqtyq sharalary aýrýdyń aldyn alýǵa septigin tıgizedi. Jedel shtab tarapynan indetti aldyn alý úshin tıisti jumystar júrgizilgenimen jeke bas qaýipsizdigi árqaısymyzdyń jaýapkershiligimiz ekendigin umytpaǵanymyz jón. Qalamyzda koronovırýstyń taralýyn toqtatý maqsatynda, barlyq semeılikterdi bekitilgen erejelerdi saqtaýǵa shaqyramyn!», – deıdi Naılıa Álmeneva.
