Semeıde koronavırýs juqtyrǵan naýqastardyń ishinde 4 bala bar
SEMEI. QazAqparat – Sońǵy málimetterge súıensek, elimizde juqpaly indetke shaldyqqandar sany 4834-ke jetti. Onyń ishinde Shyǵys Qazaqstan oblysynda jańa 10 jaǵdaı tirkeldi, dep habarlaıdy QazAqparat tilshisi.
ShQO ákimi baspasóz qyzmetiniń habarlaýynsha, Semeıde COVID-19 vırýsyn juqtyrǵan 10 naýqastyń ishinde 2019, 2014, 2011, 2010 jyly týǵan tórt bala, 2003 jylǵy stýdent jáne 1939 jylǵy zeınetker bar. Sondaı-aq 1977 jylǵy áıel jáne 1974, 1978 jylǵy er adamdar qaýipti dertke shaldyqqan.
«On oqıǵanyń toǵyzy buǵan deıin aýrýhanaǵa túsken 1963 jylǵy azamatpen úı oshaǵy boıynsha jaqyn baılanysta bolǵan naýqastar tobyna jatady. Al 1995 jylǵy jigitte dert skrınıngtik tekserý barysynda anyqtaldy. Qazirde Shyǵys Qazaqstan oblysynyń aýmaǵynda koronavırýs ınfektsııasynyń 43 jaǵdaıy tirkelgen» delingen málimette.
Osy rette oblys ákimdigi turǵyndarǵa úıde dezınfektsııa rejımin saqtap, únemi jeldetip otyrý qajettigin eske salady. JRVI belgileri bar adamdarmen tyǵyz qarym-qatynastan aýlaq bolý kerek.
